KAWLPI THUTHANG PAWLKHAT

MUNLAI-AH BAWLUNG KIDEMNA NASIA MAHMAH
Munlaite' hanciamna tawh Sept.25, 2012 panin Kawlpi huam teng leh zangdawk pawlkhat bawlung kidemna pen Munlai tualpi-ah nasiatakin nei uh a, muhnop mahmah, a en zong tam mahmah zel hi. Tukha 29 ni ah final sui dingin geel uh hi. Kawlpi khuasung veeng tuamtuam pan a kihel ban ah a minthang diak ahi, Tahan F, Tahan B, Muntha, Chekan, Singunau cihte zong kihel a, Pyidawtha leh Lepanchaung lamteng zong kihel uh a,
(Team 31) tak pha uh hi. Mai-ah ZOFA kimawl ding zomi bawlung team pawlkhat zong kihel uh hi. Khatvei suih tawh a lel te khawl suak pah uh hi (kawlpau in, sungthuatpuai, cih ding hi'n teh). Hih mun ah phitmut zong Kalay District Sports lampan a mintnang teng mah la uh a, thupi suahsak tuam ban ah kimawl mite' buai theih nading pawlkhat phatuam hi, cih kimu hi. Zani a kimawl ding pen Tahan B leh Satawm hi a, Satawm pawl in, mundang panin bawlung siam mahmah khat mi gu uh ahih manin Tahan B te'n sang zo lo ahih manin kidem nawn lo uh a, mipi khualna tawh Tahan B leh linesmante a kipan bawlung siam pawlkhat team khat ah pangin kidem heel uh a, muhnop kisa veve hi. Tua pen mark lak om lo hi.

VIP KUMPI MEI VAI

A beisa lamin VIP ci-in kumpi nasemte leh sum nei diakte in a special in mei a ngah det uh pen nung lam deuh a kipanin tuabang om sak nawn lo in, mihau mizawng leh kumpi mi cih omsak tuam lo-in a kibangin ngahsak uh hi. Veeng khat leh khat kilahsak zel uh hi. Hih pen meter box a neisa teng genna ahi hi.

BAWDA SANG PAWLKHAT IN MI SAT HAHKAT

 Kawlpi Boarding home pawlkhat ah sangnaupangte' pilna ding deihsakna leh a sangmin/bawda uh minphatna ding utna tawh sangnaupangte gan sat bang a a sat pawlkhat om tuak ahih manin minsia man mahmah uh hi. Tuhun pen kisatsat hun hi nawn lo a, a ginat kei vua leh nu le pa te samin hilhsak, warning pia, nihvei thumveina ah a ukhak vua leh khawlsak cih te pen a lampi hi zaw dingin kigen hi.

MOTOR CYCLE LICENSE BAWLNA KHAWLSAK PHOT
Nungsung teng Motor cycle license bawlna kha nih sung bang a kihong pen ciangtanna om mahbangin Oct.5 ni a kipan kikhawlsak phot cih ki za a, a hon kik ding kician nai lo hi.

VEENG SUNGAH SAILUNG TANG LOTNA & KEEP LOTNA TAM
Kawlpi pen a diakdiakin eimite' teena veeng sungte ah vasabetna hangin sailung tang lot na om thei zel a, inn khat leh khat kikamtamna, kibuai lawhnate om theih tuak zel hi. Pasal no pawlkhat in sailung lot baihsak uh hi. Tua manin mi om muang kha, ahih kei leh inn hoihte padenpauh maan kikha tam, mei bulb te kitam cih om thei zel a, nu-le-pate'n veen huai mahmah kisa ciat hi. "Keep lawn" (Kawl pau-in, Biauhphauh) pen khuado kuan teh kinak lot mahmah hi. Eimau inn sung leh pawibawlnate ah i lot a leh zong mite vangik piak loh ding thupi kisa hi. Hih keep lotna ginngaihluate' hangin mi lungtang natna nei pawlkhat pen kipuk vat thei mawk uh hi. A poi khat ah lampi a paikim lai a pan khawng panin a mai ah lawn vat cih te kituak thei zel ahih manin hibangte pen kumpi in zong a phak hi masa lo hi. Nungkum lam bangin news te ah Yangon khuasung bang pen keep lawnte leh a zuakte kum 3 thong kikiasak ding, thupuakte pahtawina kipia ding cih khawng zong om ngei hi.

SIAMSINTE'N LAIVUAN KHIN TA

 Siamsinte'n tukum laisin kum a ding laivuan khin uh a, a mun ciat uh zuan khin ta uh hi. Nov.kha bei lam ah hong kik ding ci uh hi. Laisin dan a thei nai lote' a dingin, a beisa kum ciang pen Bachelor degree piakna dingin kum thum hi ta leh tukum a kipanin kum li dingin khanto uh hi.

KHUAPI LEH KHUATA HAMPHATNA KI-LAMDANG
Kumpi thak hong kahzawh khuata khantohna zong tampi hong bawl uh ban ah, Kalaymyo huamsung a inn leh veeng kizom ciatciat mah ahi, Tai 8 leh tai 9 a om, Sangsia leh kumpi nasemte' khasum ki lamdang hi. Tai
giat pen Sagaing divisian in huam a, Tai 9 pen Chin State in huam ahih manin sangsia khasum bang pen tul sawm thum bang a tamzaw-in tai 9 a semten sang hi kici a, tai 9 a mun ngah ding mi ut mahmah uh hi. Khuata lam ah zong tuadan mah hih tuak hi.

YOMA BAK MAI AH ACCIDENT TAM THEI PHADIAK
Kawlpi Yoma Bank innmai a, meikhuam pen motor cycle tawh taih kha a misi pen thum leh li bang om ta kici hi. Tua pen kum khat in khat bang hi hamtang hi, ci-in kigen hi. Hunkhat lai in zong tua meikhuam gei a, singkung tungah kisai lo takin mi khat kah a, kia ahih manin sipah hi, cih kigen hi. Tunung mahmahin zong Zomi tangval dawnglai khat in phulum hi. Lamkawina tak hi a, meikhuan pen lampi area sungah om mawk mah ahih manin a hi thei ding thu khat zong ahi hi.

ZOMITE VEENG LEH MIDANGTE VEENG
Zomite veeng a tamzaw thamte pen kilamdang thei tuan nai lo hi. Tat Oo 7 sungah pen lui kanna lei kidawh tam ahih manin veeng hausa leh mipite mapanna tawh lei pawlkhat tukum sungin kidawh beh a, khantohna khat hong suak ding hi. Lampite bel kibang tuam cih ding hi. Midangte veeng pen a tamzaw tham kattaza, kultal lampi kipha a, tuk leh khal in khuasung kawmna lampi nuam hi. Tuaban ah guta misia zong tawm diak hi. Cycle mot hawl lua leh mi ngongtat thei pawlkhat te zong veeng pawlkhat bang in pang thei zel uh hih tuak a, ettehhuai kisa hi.

KHUADO PAWL VAI TAWH KISAI
Kumsim a kinei Khuano pawi pen zat dan kibang kim lo hi. Khamtung lam a teng, Thangkaikual teng bang in Oct.kha nipi masa sungin bawl ciat uh hi. Kawlpi lam ah Oct.kha bei lam, kha liik hun tawh a kituak thei dingin kibawl zaw den hi. Tukum a dingin zong a beisa kumte ah Tedim Association a kici, Zomi mipil leh makai lian a i neih pawlkhatte vaihawmna leh tu-in Zomi ngeina leh lailam cih min tawh a tangzai zaw dingin geel uh a, tu kha 29 ahih kei leh 30 ni pawl dingin geel uh cih kiza a, kilawp khol thei mahmah hi. Committee te fundraise zongin mangbang keei uh hi. Thapia ciat ni.

By/- Peter Khampu (Kawlpi)

Zogam leitang manpha deuhna mun te, Kawl zangkawh te kiang kizuak ta

Zogam khanglam, Kanpetlet gam sung ah Desert Green Gold Metal and Gold Purtfication Co.,Ltd pan Managing Director U Sai Win Myint in, Kanpetlet gam sung Yin-kuai-taung Singkung hawina huam sung ahi, Yar-Taung mun teng ah Sik San zongnuam ing ci-in, Zogam Zumpi ah siauhna lai puak cih ki za hi.

Pia ding/ pia lo ding tawh kisai-in, Zogam Makai pi te, Cabinet Meeting bawl ding uh a, tua pan phalna kipia ding cih Pu Kyaw Ngein (Vuangyi) tung pan ki zasawn hi.

Myanmar President Office pan Minister(6) U Hla Tun Zogam hongzin

Kawlgam Zumpi pan in, Minister (6)na ahi U Hla Tun leh a lawm te Zogam, Falam, Hakha, Tedim, Tonzang lam gamvan dingin, 8.10.2012 (Monday)in, NayPyiTaw-Kalay vanleng tawh hongleng in, Kawlpi Vanleng tual pan in Chin State, Chief Minister U Hung Gai, Lokhawh-Gankhawi lam Vuangyi Pu Van Thawng, Palik lam pan DCP, Falam pan District Health Officer ten vaimuakna/vai dawn na va nei thei hi.

Khai Kam (9-miles) Akkhawina, Ngasa khawi na te hongvel sak in, hong etdik sak hi. Taigen ah Zingan ne in, tua pan Falam lam hong zuan uh a, Falam Zato pi leh, Nurse sang inn te hong et/ hongvel sak uhhi. Tua pan nitaak lam nai(4)in Falam pan Hakha lam manawh in, Falam-Hakha kikal ah Ramthalo khua te Niangteh ciin na te zong thapiak na hongneih sak uhhi. Hakha pen nitaak 6:45 kiim khawng, Pyitaungsu Guest House pan in, Kumpi nasem ulian uneu khempeuh, khuanu khuapa teeltuam te leh NGO pan saptuam pawlkhat in, Zo Ngeina tawh dawnna, vaimuak na kinei-in, nitaak ankuang umkhop khit ciangin, khuanu khuapa pawlkhat leh Gankhawi, Lokho nasem te pawlkhat tawh kimuhkhopna, holim na ki nei thei hi.

9.10.2012(Tuesday) Zingsang niangtui dawn khit, phalvaak tungin, Hakha khualui lam aa om Phunggyi sangah, letsongpiakna leh biakpiakna khat va nei uhhi. Tua khit ciangin, Kumpi te kep ahi, Lotol naupang no te kimakaihna sangah vahawh in, tua pan hong ciahtoh kawm in, Zato ah Siahuan, Siamah te leh Zum nasem te tawh kimuhkhopna, kisap pulakna leh kisap na te behlap, huhnapiakna hun khat hongzangh thei uhhi. Tua ban ah Zato in lamthak ding aa kigeel, Nausuak sakna innpi leh Cidam lo te ki khei, ki at na ding mun, geelnasa leitang te et cian na nei thei uh ci hi.

Tua khit ciangin, Myodaw Khanma ah Mipi tawh kimuhkhopna zingsang(08:35)in hun kipan thei hi. Zogam sungthu tom-kim-cing in Pu Myint Aung (State Commissioner)in thusun na hongnei masa hi. Tua khit ciangin Pu Hung Gai (Chief Minister)in, Zogam Zawn leh gau a bei na ding, ngimna, geelna leh huhna hongkipia Billion(2000)vai, Billion(1000)vai leh Sialkhawi nang aa huhna hong kipia te vai... etc te tom-kim-cing in, Presentation tawh pulak na hong neihi. Tua zom in, Khawi leh vulh Vuangyi(Minister) Pu Van Thawng in, Zogam sung ah Gankhawina vai, Lokhawhna vai te tom-kim-cing in hongpulak hi. Tua teng khit ciangin Kawlgam zumpi pan Khawi leh Vulh lam Ukpi pa ahi, Pu Ohn Myint in telgen na leh huhding, mapan lai ding te genna, thapiak na nei hi.

Tua teng zom ah Zogam Social Minister Dr. Ba Maung in, Cidam na lam tawh kisai, Zogam dinmun leh Zogam ii kisap Cidam na lam Vanzat, Inn, Siavuan, Siamah vai cih bangin  pulakna hong nei a, tua pulak na te tungtawn in, Kawlgam Zumpi lam pan Prof: Dr. Phe Thet Khin (Health Minister)in, telgen na leh cidam na lam tawh kisai kisap na te behlap na hong nei thei hi.

Hakha gambup Sialkhawi makaipi pa ahi U Ram Cung in, Sialkhawina tawh kisai huhna ngah lungdam kohna, mailam ah kisap na te ah huhna nongpiak lai nang uh ahi zong, sialkhawina ii pattuamna te lungdam koh kawm leh deihnget kawm khat thuah in, hun khat hongzangh hi. Tua ban zom in, Thantlang pan Hluttaw Ku-sa-le U Robin in, thusunna pawlkhat hongnei hi.

Tua teng aman khit ciangin, Kawlgam Government Zumpi pan Minister(6) Pu Hla Tun in Hunzawh lungdam koh thugen na tawh Sun(11:15)hun in Mipi tawh ki muhkhopna kihial bawl thei hi. Pyitaungsu guest ah Sun an neekkhop na a kineih khit ciangin, Hakha-Falam- Kalay lam tawn in, Motor tawh Minister(6)leh pawlkhat ciahkik ta uhhi.

Tu tung U Hla Tun tawh hong kithuah thei teng ;

1. U Hla Tun, Minister, Ministry of President Office (6)
2. U Ohn Myint, Minister, Ministry of L & W
3. Prof: Dr. Phe Thet Khin, Minister, Ministry of Health
4. Dr. Mon Mon Aung, Health Minister Wife
5. Daw Thet Thet Shwe, Information Minister Wife
6. Daw Yu Yu San, MCH
7. Dr. Min Tan Nyunt, DG, Ministry of Health
8. Dr. Tan Zaw Myint, DG, Department of Medical Science
9. U Tin Myo Kyi, DG, Ministry of Education
10. Dr. Myint Tann, DG, Ministry of L & W
11. Dr. Myint Thein, DG, Ministry of Livestock & 
12. U Khin Ko Lay, DDG
13. U Pyi Song, General Manager,
14. U Khin Zaw, DD
15. U Aung Lwin Oo, DDG
16. Director, Ministry of Health
17. PSO mi (3)
18. News la ding mi (2)
19. Director

Health Minister Prof: Dr. Phe Thet Khin leh a zi Dr. Mon Mon Aung leh a lawm te pen Tedim, Tonzang lam ah va zin to lai ding uhhi.

By/- Van Thupha