ချင်းပြည်နယ်၏မြို့တော် ဟားခါးမြို့တွင် အလွယ်တကူ အသုံးပြုနိုင်သော ငွေလွှဲလက်ခံစနစ် ဖြစ်သည့် Western Union Money Transfer ကို ၂၀၁၄ ခုနှစ်၊ ဧပြီလမကုန်မီစတင်၍ အသုံးပြု နိုင်တော့မည်ဖြစ်ကြောင်း သိရသည်။
ချင်းပြည်နယ်သည် အလုပ်အကိုင် ရှားပါးသော ပြည်နယ်တစ်ခုဖြစ်သည့်အလျှောက် ယင်းဒေသ၏ ဒေသခံတစ်ချို့မှာ ပြည်ပတွင် သွားရောက်၍ စီးပွားရှာနေကြရသည့်သူ အများအပြားရှိနေကြပြီး ယခုကဲ့သို့ ယင်းစနစ်ကို အသုံးပြုနိုင်ခြင်းအားဖြင့် နိုင်ငံရပ်ခြားသို့ အလွယ်တကူငွေလွှဲ၊ ငွေလက်ခံ နိုင်ခြင်းသည် တိုးတက်မှုတစ်ခုဖြစ်သည့်အပြင် မိမိမြို့ရွာဒေသခံပြည်သူများ လွန်စွာ အကျိုး ဖြစ်ထွန်းစေနိုင်တော့မည်ဖြစ်ကြောင်း ဒေသခံလူငယ်တစ်ဦးက ပြောသည်။
အဆိုပါ အလွယ်တကူငွေလွှဲငွေလက်ခံရရှိနိုင်သည့် Western Union ကို ဟားခါးမြို့ပေါ်ရှိ Co-operative Bank (CB Bank)တွင် ဖွင့်လှစ်မည်ဖြစ်ပြီး လိုအပ်သော Installation of Internet နှင့် Network Services များကို ပြင်ဆင်နေဆဲဖြစ်ကြောင်း သိရသည်။
Western Union Money Transfer သည် လူတန်းစားမရွေး အသုံးပြုနိုင်သော ဘဏ်အသေးစား တစ်ခုဖြစ်ပြီး နိုင်ငံရပ်ခြားတွင် နှစ်ပေါင်းများစွာကပင် အသုံးပြုလာခဲ့ကြသည့် အလွယ်တကူ ငွေလွှဲယူ လွှဲပြောင်းလုပ်နိုင်သော ဘဏ်စနစ်ဖြစ်သည်။
မြန်မာနိုင်ငံတွင် ယခင်နှစ်များကစ၍ Kanbawza, Myanma Apex, Myanmar Livestock နှင့် Fisheries Development စသည့် အနည်းငယ်သော ဘဏ်များတွင်သာ အသုံးပြုနိုင်သေးသည်ဟု သိရသည်။
ဇိုဟေဆာ(ချင်းတောင်မြေ)
