A MUANTAK KHANGNO

Pu Thuam Kho Zam, President, CCF(Hakha)

Mihing ten nuntakna hunpi (3)in kikhen aa, Naupang hun, Khangno hun, Khangham hun ahi hi. Naupang hun ih cih ciangin nu sung pan ih piankhiat nipan kum(3)dong Nute aang sung ki om aa, kum (3)pan kum(5)dong mucu (Pre school), kum(6)pan kum(17)dong naupang hun kici thei hi. Kum(18)pan kum(40)dong Khangno hun ci-in mipil te’n na ciamteh hi.
Khangno hunsung a muantak khangno khat suah nadingin 1Timothy 4:12 bulphuh leng hoih pen dingin ka mu hi. Tua sungah ''Na khangnona mite simmawh dingin om kei inla, kampauna, gamtatna, itna leh siangthona-ah thu-um mite etteh dingin om in'' ci hi.

A Muantak Khangno Khat in:
1) Biakna lam ah kipiak photphot ding thupi pen hi. Banghang hiam cih leh khangno sungah leh a diakdiak in Sunday School (Christian Education) ah Sia/siamah a sem ngei (a khang khia)khat pen koilai mun tung taleh a tuntunna munah mite makaih theih pan mawk hi. A nunglam (a meilam) ah hilo in a mailam (a lulam)ah ompah lel hi.
2) Tupna ngimna neih kul hi. Ngimna, vision omlo in bangmah tangtung theilo hi. Mipil Thomas Carlyle in ''Ngimna a neilo mite a hawlna (steering)omlo tem baw tawh kibang hi'' na ci hi. Ngimna (vision)muhkholhna ih tun mateng hangsan tak aa hanciam ding ahi hi. Thomas Edison in electric mei a ngah nading in lungkia hetlo (700)vei a hanciamna teh ngah pan hi.
3) Tuhun pilna hun(knowledge age)ah tawlnga loin sun tawh zan tawh pilna zonhuai hi. Pilna ih cih ciangin Sang pan ih sin, ih ngah degree te bek pilna hituan lo hi. Siamna khat, kivakna khat ih neih pen nuntakna hong pia zo ding pilna hipah aa, a dang tampi ih siam kei leh zong ih siam pen ih uk pen Specialized ding ahi hi. Leitung ah pilna picing cihbang om ng eilo hi. Mipil taktak ten a pilna, a theihna kicing salo in lai simsim-in a pilna uh behlap uhhi. Lai simna in mihingte hong picing(mature)sak hi.
4) Lungsim pha neihding kisam hi. Lungsim pha neihna in khantohna ding foundation hi. Mi huhnopna, deihsakna (charity)nei hi. Mi elbawl lo aa a gamtatna zong hoih pah hi. A muk a kam a pumpi leh a lungsim siangtho hi. Ki phasak lo aa, thukhat peuhpeuh ah a hoih lam in mu (positive thinking)hi.
5) Na khialhnate nial huailo hi. Khialhna a nei ngei khollo te bangmah a semlote hipah hi. Tam a semte khialhna zong tam hi. A khial theilo kuamah omlo hi. Ih khialhkhak leh nial huailo aa, khialmah ing cih (confess)na in gualzawhna hizaw hi. Mipil ten nalian khat peuhpeuh a sep ciangin midangte kiang ah ka khialhna a om kha hiam? ci-in dong zaw uhhi. Midangte' ngaihsutna la zaw uhhi.
( Hih laimung pen Pu. Thuam Kho Zam, President, CCF-Hakha ii honggelh ahi hi.)

MAIPHA NGAH TANO

Pu Cin Lian Pau, Minister, Chin State Government, Myanmar

Ih Topa Pasian hoihna leh a hong hehpihna hangin Khalkha khuapi-a om Nipisang kimakaihna te in kumkhat khatvei, a kihawm zel ahi “Birthday Awging”pen CCE kum(28)cinni hawm ding sungah ''MAIPHA NGAH TANO'' cih  thulu tawh khangthakte ading, Kammal hoih thuhilhna laiat theih nadingin hunhoih hunnuam hong musak Pasian min ka phat masa hi. Zogam Vuangyi(0efBuD;)khat ka hih banah CCF(Hakha)adingin Dotpi khat ka hihna tawh article at thei ka hihmanin CCF(Hakha)a piantheih nadingin mi masa ih Nu leh ih Pate, asisa leh anungta lai ih Nu ih Pa te, a gima tawlteng khempeuh Topa min tawh Zahtakna ka pia hi. Thang Ho leh Lian Do te unau tangthu sungah mimtang phelbat, taangtang phelbat in khang sawnsawn ading thukhual nasep hoihte zop tohtoh ding, tua thupha in a khangkhang in ong kip tawntung tahen! Amen...
Mihingte khan sungin naupang hun, khangno hun, nupi papi hun leh vuai le teek hun ci-in ki khen thei hi. Naupang le khangno hun anuam pen in kiciamteh hi. Khangno hunin pilna ngahnading a thupi masa hi-a, na neih khempeuh na beilawh zong in na zonding ahihi. Pilna deih-in, mi lianin hongbawl dinghi. Limtak pomin, pahtawina hongngahsak ding hi. Maipha ngah tano hih nadingin pilna neihding thupi hi. Kumpi Solomon in, Ta pil-in, a pa lungdamsak-a, ta hai in anu dahsak hi cih i simthei hi. Pilna adeihte, ki thuhilh ding ut uh-a, kitai ding utlohna pen haina ahi hi.
Leitung mihingte pilna namtampi om a, nainganzi pilna (political science) pilna asang pen hi ci-in mipilte in ciamteh uhhi. Political (EdkifiHa&;)nasep pen nasep dangte tawh kibanglo in mikhat in vote nei in suahtakna om hi. Galkap mangpi Napolean in a zi uk zolo aa, gamuk makaite mai ah etlawmlo takin anial (langpan, alehlam, alang lamah) bawl ahihman Napolean in galkap honpi uk zo napi a it a zi uk zolo hi.
Kong it sanggam u le naute aw, Nu leh Pa Itna bangzahtakin lian hiam? Tate tungah lametna bangzah takin lian hiam? Tate adamloh ciangin bangzah takin kilunggim hiam? Tate vaak nading, tate pilna zonna, sang kahnading bangzahin ki lungkham hiam? Cidam in pil-in Nu leh Pa a Teek a vuai ciang ongkhoi ong kem in, lungdam lungnuam tak aa om ding ki lamen hi. Abraham in Pasian maipha ngah hi. Banghang hiam cih leh Pasian zahtaakin a thupiakte mang hi. Pasian maipha ngah hi. Pasian maipha tano, Pasian in ka lung hong damsak tano ci-in Laisiangtho sung ah ki at hi. Nang zong Abraham bangin na Nu leh na Pa Zahtakin ong thuhilh ong thupiak te mang lecin ''MAIPHA NGAH TANO''na hihi. Topan thupha hong pia tahen! Amen...

(Hih laimung pen P.L Cin Lian Pau, Minister, Ministry of Electricity & Industry, Chin State Government, Hakha in, Khangthak tano te ading hong gelhkhiat ahi hi.)

KHANTOH NADING THU LAIGIL NAM(10)

Pu Hau Khen Kham (Speaker, State Parliament, Chin State, Myanmar)

1) Vaikhat peuhpeuh ih kikup ciang, ih thu ih vai thupi sim in, ih ngaihsutna takpi tawh kikum, vaihawm ni! Pawlpi sungvai, kipawlna khatpeuh ahizongin, khuasungvai, gam le lei vai, kipawlkhawm aa nasepna, vai tuamtuamte ah thu kikum, vai ih hawm ciang thudang hel zelzul loin ih thu kikup pen mah thupi sim-in lungsim ngaihsutnate genciat dinghi.Thu kikup laitak bangmah gen lo-in, a khua nung ciang peuh in gen mawkmawk lo ding, a hun lai-in gending kisam hi.
2) Vaikhat peuhpeuh ih khensat ciangin thu kikum mi a tamzaw hoihsakna tawh thukhentat ni! Thu khat peuhpeuh ih vaihawmnate ah thu ih khentat ciangin thu kikum mi a tamzawte khentatna zuihding hoih pen hi. Makai khat peuh a zagol zawdeuh, a khuamu zawdeuh khatpeuh deihkaihna tawh midangte ngaihsutna zong la mello in ama thu bek tawh thu khentat thei hi.Tua bang hilo in ki dong kim in ngaihsutnate gawmkhawm-a thukhentat leng thu hoihpen hi. A hunlai aa genlo in, a mantak ciang... kenbel ka gennuam kei-a hiven thukhentat bel hoih sa het keng, khuanung cih kei ni! A hunlai genngam semngam zaw ni!
3) Thu neihnop luatna, mindeih luatna, angsungvai huaiham luatna te khiamin nasem ni! Kipawlna khat peuhpeuh leh vaihawmna khat peuhpeuh ah thu neinuam deuh, a huaiham deuh, panmun deihdeuh, mindawk nuam deuh, angsungvai huaiham deuh a tamluat ciangin kipawlna kisia aa tupna tangtung theilo hi. Lim ngaihsut mahmah ding thu ahi hi.
4) Khat le khat ki thupi sim in na sem ni! Mihingte lungsim ah meel le thagui ahizongin, mun le mual, khua le tui zui-in ahizongin ih neih ih lam zui ahizongin ih siamna ih theihna ih khuamuhna zui ahizongin khat le khat kaal, pawlkhat leh pawlkhat kaal ah kineu muhna, ki simmawhna, ki haibawl nate hong om ciangin ki-itna bei-in kipawlkhopna omlo-a, ngimna tupna ki tangtung theilo hi.Ki-elna, ki muhdahna tawh kidim lel aa kiamsukna vive ki phukha hi. Ki thupi sim leng ki-it, ki ngaihna khang semsem aa thunuam in ki khangto hi.
5) Thumanna(obedience) thupi ngaihsut ni! Mi pawlkhat te in Hausa Upa vaihawmte thumanna pen haina, guallehna, simmawhna, miphaklohna,vangneuna sa kha zenzen uhi. Nu leh Pa thumanna, Hausa Upate thumanna, pawlpi upate thumanna, honguk Kumpite thumanna in Cidamna, Khansauna, Daupaina, Kamphatna, Thupha ngahna ahi hi. Thumanna pen neiciat, zangciat lehang ki khangto mahmah dinghi.
6) Nasep silbawl hahkat, citak in sem ni! Mi pawlkhatte in lo naseppeuh, huan naseppeuh, gancin naseppeuh zumpih zenzen uhhi. Ih Kumpi nasepna, ih laisimna, ih tang nasepna, ih thacial kuanna, kipawlna tuamtuam aa nasepnate ah hahkat citak takin sem lehang ih innkuan sung, ih pawlpi, ih khua, ih gam hong khangto dinghi. Nasepna peuh zumpih kei ni-in, nasemlo-a mawkvakvak, laisimlo-a mawk tuttut te zumhuai zaw ahih lam phawk ni!
7) A siangtho gamtatna leh lungsim siantho zawhding hanciam ni! Ki niamkhiatna, khat le khat ki zahtaak bawlna, pumpi siangthona, lungsim sungah thusia, lasia, gitlohna, a kihhuai ngaihsut lunggulhnate om sak lo-in, akilawm, a etlawm omdante neihding thupi-a, tua a siangtho gamtatna leh lungsim siangtho neihna-in mi daupaisak,vangneisak, maipha ngahsak hi.
8) Thupha kipiakna leh kihuh ki panpihna nei ciat ni! Khat le khat ih ki phunsan nate, ih ki gensiat nate nusia-in khat le khat thu kingetsak, thupha kipiapia lehang a piate lah supna omlo-in, metna kinei zaw hi. Khat leh khat ki hawmthawh-a ih kimawhsaksak sangin ih thanemna te, tha le ngal, neih le lam te tawh ih hihzawhlohte kipanpih diamdiam lehang ih khangto hulhul dinghi.
9) Biakna leh Ngeina tonkhawmsak theihding geelsiam ni! Biakna ih cih in ih nuntak sungin mimal ahizongin innkuan sung, khua le tui leh ih gamsungah ih cidamnading, ih daupai nading, ih lawhcin nading, ih ngim ih tupnate a tangtun nading, deihna lunggulhna te, Ngimna le tupnate ih tangtun nading, hong bawlsiate ih kidal nading leh ih sih ciang ih kha noptak aa a om theihnading, ih sep ih bawlte in BIAKNA ahi hi. Ngeina ih cih pen minam khat ii leitung nuntakna-ah sep leh bawl, nopna dahna ah ihsep ih bawlzia te, ih gamtatdante leh ihneek ihdawn dante in NGEINA ahi hi. Minam khat ''NGEINA''ih cih in mimal vai, innkuan sung vai, khua le tui vai, gam le lei vai, ih minam sungah leitung nuntak nading ih sep ih bawlnate, nopna dahna ih tuah ciang ih sepdante, ihneek ihdawndante in NGEINA ahi hi. Tua ahihmanin Biakna leh Ngeinate pen telsiam in zangsiam lehang ih minam sung ah nuam mahmah dinga,ih khangto mahmah dinghi.
10) Sawm-ah-khat piakna leh piakkhiatna tuamtuamte hahkhat ni! Midangte tung ah thupha bawl aa a kisapnate uh huh aa panpih aa piakkhiatnate leh pawlpi ading  sawm-ah-khat piakkhiatna pen mikhat adingin nasep hoih mahmah hi aa, hauhna le nopsakna ngahna, thupha ngahna taktak ahihi. Mi peuh ih koko ih gensiatsiat sangin huhna pia giapgiap zaw ni! Sawm-ah-khat zong tatsatlo in pia ni! Leitung khempeuh in sawm ah khat pia henla, Pasian Laisiangtho gen bangin, sawm-ah-khat ah citak ni! Tua hi leh Leitung ih nuntak sung Hauhna leh Nopsakna ih ngah taktak dinghi.
(Hih laimung pen Pu Hau Khen Kham (Speaker, State Parliament)in, Khalkha Ciimnuai Sunday School 28 cin Birthday aa, khangthak te zuihding-a, honggelh khiat ahi hi.)