ZOMINAM NI TAWH KI SAI NGAIHSUT KIKUPNA (KIMUHKHOPNA)
Delhi Sangkah naupang te kipawlna
(Chin Student’s Union)leh Zomi Community te (3.11.2012) 3:00PM in Zomi
Community zum ah kimuhna nei cih kiza hi. Hih kimuhkhopna ah CSU lam pan in
Mi(17) kihel thei ci hi.
Hih kimuhkhopna pen CSU lam pan
Zomi Community te kiang kimuhkhop ding lunggulh nate lai a kikhak khit ciangin,
lungkim na aom khit ciangin ki muhkhopna a kinei hi ci uhhi. CSU lam pan
Ngaihsutna pia (Advisor)a hi Dr. Run Bik, Pa Salong leh Pu Min Thang te kihel
thei hi. Kimuhkhopna ahang pen tu
nungkum CSU makaihna tawh a kibawl 64th Chin National Day hun in,
Zomi Community te’n a tuam in Zomi National Day a bawlna tawh kisai a hihi.
Hih thu tawh kisai-in, CSU
Presiden Salai Sang Hnin Lian in, “Hih bangin ih kimuhkhopna pen Delhi aa om
Chin minam khempeuh in, hong tung ding The 65th Chin National Day ah
kipawlkhawm in, ih bawlkhop ding lungtupna tawh kimuhkhopna hong nei ka hi uh
hi “ci-in gen hi.
Zomi Community lam pan in,
nungkum 64th CND a tuam in bawlna ahang CSU lam pan dotna hongnei a, Zomi Community
pan President in, “A masa pen in, tu a bangin community huam in, nonghawh man
un, lungdam ungh. A beisa hun ah hibang aa ki hawh, ki muhkhopna cih bang om
ngeilo a, no khangno te’n nonghawh man un, lawhcing, thupi mahmah hi. Tu
nungkum ah Zomi National Day a tuam in, bawl na cih uh pen manlo(diklo)hi,
adangin ka bawl uh hi peuhmah lo hi. A beisa hun te ah Announcer te leh Thu
tomgen pawlkhat te’n ka theihloh uh pau tawh hong genden hi. Hakha te’n Hakha
pau, Falam te’n Falam pau ih thu honggen ciangin ko mipi tampi’n, ki thei lo
hi. Tua kawmkal ah Kawlpau nangawn zong Community sungah a theilo tampi om hi.
Tua bang haksat na ka tuah uh ciangin a tamzaw te lungkim utna tawh, Biakna
makai te makaihna tawh a tuam in a kibawl ahi hi. Chin cih paisan in Zomi ah
cih ngimna cih bangin ka bawl uh hi lo hi. Chin National Day pen Tedim pau in
Zomi Nam Ni, Hakha pau in Lai Phunpi Ni, Falam pau in Laiphun Suah Ni cih bang
hi lel a, Zomi National hi lo zaw a, ko mau pau in Zomi Nam Ni a bawl ka hi zaw
uhhi.
Delhi ah 1997 kum pan 2012 ciang
kitat lo in Chin Students’ Union makaihna tawh Chin National Dal a kibawl den
ahihi. 2011 kum ciang Chin mi khempeuh huam in, lungsim kikhat in a kibawl den
hi a, 2012 kum ciangin, Zomi Community te in, a tung aa President gen, haksat
na tuamtuam te hangin, hong kihel lo uh
hi. Hih thu tawh kisai-in, Zomi Community pan General Secretary Neng Za Dong
in, “Tu nungkum Chin National Day in zong kong kihel mah uh hi ci-in ka
ngaihsun hi. Banghang hiam cih leh Sum don na tuamtuam te ah kong kihel uhhi.
Fund Raising bawlna, Lucky Draw bawlna te ah zong, Biakinn khempeuh ah kong
zuak sak uhhi. Pawini ah zong tangmi
(representatives)zong kong pai uhhi. Tua bek hi lo in, ko sung mipi lak ah zong
utna peuhmah paithei ci-in, ka kisawl uhhi. Tua man in, tu nungkum CND ah Zomi
Community te hong kihel lo cih thuleng pen ka lung uh nuam lo hi.” ci hi.
CND bawlna-ah CSU makaih na tawh
Community khempeuh kihel kim dingin, Celeberation Committee a kibawl khit
ciangin bek in ma a kipang hi a, Community khempeuh huam in, a kisam tuamtuam
te zon (don)hipan zel hi. Pau telloh buaina tawh kisai-in, Sumkeem ahi Cing
Khan Dim in,”Ko lam te ii ka lawhcin lohna penpen khat in Chin pau a hi Lai pau
(laiholh), Laizo cih dan pen kisiam kei uhhi.
Tua banah ka awsuah uh a dan deuh man ahi diam, pau dang te theih ding
haksa phadeuh hi. A tamzaw theih a hi, kawlpau nangawn pen a theilo tampi om
in, Chin mi dang te tawh tehkak hi leng, ka namaplohna penpen uh ahihi,” ci hi.
Hih kimuhkhopna-ah CSU lam pan in
Chin ah Pumkhat hihna (We are one in Chin)leh mailam ah lungsim kikhat in, Chin
National Day bawlding lunggulna President in,” tusun kongpai na uh pen kong gen
samah bangin, mailam ah lungkikhat ah munkhat ah ih bawl theih ding a hihi. A
beisa hun a ka khialhna te uh hong manggilh sak unla, ka kisapna te uh khat leh
khat ih kihuh diamdiam ding hong thum nuam uhhi. Hong tungding The 65th
Chin National Day munkhat ah Zomi Community mipi khempeuh tawh a zangh khawm
dingin kongsam uhhi. A beisa hun aa pau kitellohna, a dang ki cinlahna
khempeuh, tu kum ah a hoih theih pen in, no mau tawh kipawl in bawlkhawm thei
ding cih lungmuanna ka nei uhhi”ci-in gen hi. Tua khit ciangin Zomi lam pan
President in,” Hi banga lungsim kihual theihna’ng aa nong hawh uh pen ka
lungdam mahmah hi. Chin(Zomi)cih pen a kikhen thei lo te ihi hi. Bangmah hun in
ih kikhen kei dinghy. Tua ahih manin, tu a ka haksat nate uh mipi tungah zaksak
na ka na nei masa dinga, tua khit ciangin thu kong zasak kik dinghi.
Munkhat ah a zangkhawm(bawlkhawm)thei dingin, keima ngaihsut na-ah upna
ka nei hi”ci-in, anunung pen kamdawn na nei hi.
Chin Students’ Union in, Delhi aa om Chin Community tuamtuam
te zong kimukhopna nei lai dingcih ki theikhia hi. (Chin Students’ Union nih Delhi um Chin community dang zong ton an
timh hna tiah thawng kan theih)
By/-
http://www.thechinlandpost.com/index.php/tech/technology-news/myanmar/823-kdahs-nkada-sd.html
