A KHATVEINA ZO NGEINA LAAM, LASAK KIDEM NA KINEI

Zogam khuapi, Khalkha khua, Zo Ngeina laam kidem na Innpi mai ah

Tu ni (Oct 14, 2012)ni Zogam khuapi, Khalkha khua ah, Zo Ngeina Laam, Lasak, La at, tumtheih tuamtuam tum.... ki dem na, a ni masa ni, nitaak lam (2:00)PM in, Hakha, Yethit Ward, Myodaw khanmaa ah thupi tak in, ki bawl thei hi.

A khatveina, Zo Ngeina tuamtuam te kidem na honna, Dr. Ba Maung, Col. Zaw Min Oo leh U Win Myint Kyaw te'n khau at na tawh hon na hong nei uhhi. Tua khit ciangin, kidemna inn sung ah kilut phei-in, Hungeelna om bangin, Matpia ding te a mau mun ciat ah a tun khit ciangin, Gua tuah lam kidem na te ki nei to hi.

Ki dem na amasa pen in, Falam gamhuam pan kidem na hongnei-in, Ngeina puan te zong nasia thei mahmah ahih man in, mipi'n hoih kisa mahmah hi. Tua ban zom ah Hakha gamhuam pan in khangno te'n kidem na hong nei-in, hoih mahmah in, et lawm mahmah hi. Music tawh kop in laam na hongnei uhhi. Tua ban ah Tedim gamhuam pan hi a, tu tung Tedim pan hongpai te in, Ngeina puan a lamdang deuh khat in, Ngeina puan a eng tawh hong kidem uhhi. Lasa te siam mahmah ahih man in, thukingah peuhmah hi. Tua te zom ah Tonzang pan khangno te'n Ngeina lamna, Ngeina puankang tawh hong lam uhhi. Thantlang in hong zom in, Kanpetlet, Matupi, Mindat cih bang in, ei ngeina tektek tawh kidem na te hong nei uh a, et lawm thei mahmah hi.

Matpiakna te pen nitaak (6:30)Pm in hun(3)na kipan kik dinga, tua hun ciang gen ding ci hi.

Hi bang kidem na pen Zogam ading in, a khatvei na hi a, thupi leh nopci mahmah hi. Media tuamtuam pan zong news laakna zong nei tek uhhi. Tu tung Ngeina Laam, Lasak kidem na pen Tu ni leh zingciang (14.10.2012 to 15.10.2012)ciang ding a hihi.

Gennop tampi tawh hi zah ciphot mai ni! (zop lai ding)

# Van Thupha